તકદીર છે

 

 ગુલ પાંખડી સમ આંખડી મુજને જુએ તકદીર છે

કમનીય આ નયનો જુઓ કવનો રચે તકદીર છે

હળવાશ આ કુમળાશ આ તમને મળી તમને ફળી

ગુલ છો તમે પણ ભૂલતા નહીં મોખરે તકદીર છે

તુજ સાધના ફળ પામવા મથતી રહી પણ ના ફળી

ધર ધીર હીંમત રાખ તું બદલાય છે તકદીર છે

લજવે કદી પજવે કદી પરખે કદી પડખે કદી

નખરા સહે લટકા કરે ઝટકા ખમે તકદીર છે

તલવારથી તકદીરના ફરમાનને બદલાય નહીં

ઢગલો ચલણ ખર્ચો છતાં પણ ના મળે તકદીર છે

ગરકાવ મન થઈ જાય છે અવકાશના ઉંડાણમાં

વિચરે પછી મનમાં સવાલો કોણ એ તકદીર છે

અભણ અમદાવાદી