કલરવ [ગીત]

કલરવ [ગીત]

કલરવ કરતી કામણગારી કામિનીની કંચન કાયા

મનમાન્યો માણીગર માણે માનુનીની માદક માયા.... ...કલરવ

કેડે ઝૂલે કંદોરો ને મસ્તક પર સોનેરી ટીકો

દર્પણનો શણગાર જોઇને ગોરી મીઠું રે મલકાયા...........કલરવ

સ્વર્ણલતા શી દેહલતાને પુષ્પલતા શી માદક ખુશ્બૂ

ફૂલો પર ફાગણ મ્હોર્યો તો ભમરાઓનાં મન લલચાયાં.. કલરવ

પ્રેમાલિંગન પામી પારસ પુતળીનું પાવન પદ પામ્યો

લજ્જા લાલી પથરાઈ રે ગાલો પર ગોરી લજવાયાં....... કલરવ 

મખશાળામાં મટકી ફૂટી માખણ નીતર્યું મઘમઘતું રે

મઘમઘતી મનમોહીનીનાં મદનાતુર મધુફળ મસળાયાં...કલરવ .

રસશાળામાં રસહેલીની ઝરમર ઝરમર થઇ રંગીલી

રસક્રીડાનો શ્રાવણ વરસ્યો રસનાં વાદળ સૌ છલકાયા....કલરવ

લીલુંછમ છે પાનેતરને લીલાછમ છે સાજન સજની

સાજન સજનીનાં સંગમથી વંશોનાં સંગમ સર્જાયા.......કલરવ

અભણ અમદાવાદી    

ક્યાં મળે છે?(ગઝલ શાલિની છંદ)

પારેવાં શા, માનવી ક્યાં મળે છે?
આજે સાદા, મ્હારથી ક્યાં મળે છે?

શોધી શોધી, લોથ હું થૈ ગયો છું
ફૂટે ના એ, માટલી ક્યાં મળે છે?

માપે સાચી, રીતથી માણસોને
સાચા બોલી, માપણી ક્યાં મળે છે?

જોઈ રંગો, ફૂલને પૂછવું છે
ક્યાંથી લાવ્યા, તાજગી ક્યાં મળે છે?

કોઈ આપી, નૈ શકે રે જવાબ
પૂછો મા ભૈ, ખાતરી ક્યાં મળે છે?
અભણ અમદાવાદી