કસોટી

હું કસોટી પર જરા પરખાઈ જાઉં તો કહું ,
સ્વર્ણ છું સાબિત થવા ટીચાઈ જાઉં તો કહું.

કાવ્ય માં કામણ ભરી ને કંઠ કોયલ શો કરી,
હું ગઝલ કે ગીત માં બંધાઈ જાઉં તો કહું.

આવ તરવાની મજા લે, રૂપ ની છું હું નદી,
તુજ કળા ને જોશ થી અંજાઈ જાઉં તો કહું.

છે ઘરેણું રૂપનું શરમાઈને સહમત થવું,
હું પ્રથાનાં બાણથી વીંધાઈ જાઉં તો કહું.

લાખ કોશિશો કરો ભૂલી જવાની તે છતાં,
નેણથી ગંગા બની છલકાઈ જાઉં તો કહું.

આ મિલન ની રાત તો વીતી જશે પણ તે પછી,
વંશ રૂપે ગર્ભ માં સચવાઈ જાઉં તો કહું.

માન્યતા ને ભાવના થી માણસો પરખાય છે,
તે છતાં જો હું 'અભણ' સમજાઇ જાઉં તો કહું.
અભણ અમદાવાદી